Pormal na itinaas ni Pope Francis si Obispo Pablo Virgilio David bilang Cardinal ng Simbahang Katolika noong Sabado sa Ordinary Public Consistory for the Creation of New Cardinals na ginanap sa St. Peter’s Basilica sa Vatican.
Si Cardinal David ang ika-sampung Pilipinong Cardinal, kasama ang kanyang mga kababayan na sina Cardinal Jose Advincula ng Maynila at Cardinal Luis Antonio Tagle, pro-prefect ng Dicastery for Evangelization sa Vatican. Siya ay kasalukuyang naglilingkod bilang Obispo ng Kalookan.
Sa seremonya, tinanggap ni Cardinal David ang isang pulang biretta, singsing ng cardinal, at tubo na naglalaman ng mga dokumentong nagtatakda ng kanyang bagong ranggo. Magkakaroon din siya ng itatalagang titular na simbahan sa Roma.
Sa kanyang homiliya, pinaalalahanan ni Pope Francis ang 21 bagong Cardinal na sundan ang landas ni Hesus at maging mga “tagapagtaguyod ng pagkakaisa at komunidad,” sa halip na mahulog sa kumpetisyon.
“’Wag nating kalimutan na ang kapaguran ang sumisira sa ating puso. Ang mga napapagod ang unang naaakit ng katiwalian. Ang pagsunod sa landas ni Hesus ay nangangahulugang maging mga tagapagtayo ng pagkakaisa at komunidad,” ani ng Santo Papa.
Tinawag din niya ang mga bagong Cardinal na maging “mga saksi ng kapatiran, mga tagapaglikha ng pagkakaisa, at mga tagapagtayo ng komunyon,” at inilarawan ang kanilang misyon bilang “maningning na tanda” sa lipunang abala sa anyo at kapangyarihan.
Ang bagong mga Cardinal ay nagmula sa iba’t ibang bansa tulad ng Argentina, Brazil, Italya, Britanya, Hapon, Indonesia, at Pilipinas.
Si David ay naordinahang pari noong 1983 para sa Arkidiyosesis ng San Fernando at naging auxiliary bishop ng parehong arkidiyosesis noong 2006. Noong 2015, siya ay inilipat sa Diyosesis ng Kalookan.
Sa kasalukuyan, si Cardinal David ang pangulo ng Catholic Bishops’ Conference of the Philippines (CBCP).
