Sa isang makasaysayang araw para sa mga atletang Pilipino, si Carlos Yulo, ang dalawang beses na ginawaran ng gintong medalya, ay muling ipinakita ang kanyang pagmamahal at paggalang sa kanyang ama, si Mark Andrew Yulo, sa ginanap na parada ng mga bayani at pag-uwi ng mga atletang Pilipino mula sa 2024 Paris Olympics.
Habang ang parada ay patuloy na binabaybay ang mga kalsada ng Pasay at Maynila, napansin ni Carlos ang kanyang ama sa gitna ng masiglang mga tagahanga. May mga taong nakapalibot kay Mark Andrew na may dalang banner na may nakasulat, “CALOY, DITO PAPA MO.” Sa suot na itim na shirt at puting sumbrero, buong pagmamalaking ipinakita ni Mark Andrew ang kanyang suporta sa anak, gamit ang kamay upang bumuo ng hugis puso at itinuro sa langit bilang simbolo ng pagmamahal at pasasalamat.
Bilang tugon, si Carlos ay nagtaas ng kamay sa kanyang noo, at ibinigay ang isang matikas na saludo mula sa kanyang sinasakyang float. Ang eksenang ito ay nagsilbing patunay ng malalim na ugnayan ng mag-ama na pinanday ng pagsisikap at sakripisyo.
Sa isang naunang panayam, ibinahagi ni Mark Andrew kung paano pinaghusayan ni Carlos ang kanyang routine para makamit ang gintong medalya para sa Pilipinas. “Masaya kasi matagal na panahon na ni Caloy na nire-ready simula nu’ng 2020 Japan Olympics. Four years niyang tiniis ‘yan, talagang pinagpaguran ng bata,” sabi ni Mark Andrew sa mga reporter, na puno ng pagmamalaki.
Samantala, nagpasalamat si Carlos sa kanyang Facebook account sa kanyang ama para sa walang sawang suporta nito. “Maraming salamat Pa, masaya ako nakita kita don nakasuporta! Pasensya na Pa, hindi ako masyado nakakaway. Ang daming nag pa-autograph hehe,” isinulat ni Carlos, na may pangakong “Kitakits soon, Pa,” kasabay ng pag-tag sa Facebook account ng kanyang ama.
Kasama ni Carlos ang iba pang mga atletang Pilipino sa float habang kanilang tinatahak ang mga kalsada, binabati ng mga tagahanga at humihingi ng pirma sa kanilang mga t-shirts. Nagsimula ang parada alas-tres ng hapon mula sa Aliw Theater at nagtapos sa Rizal Memorial Sports Complex, kung saan muling ipinagdiwang ang tagumpay ng mga Pilipino sa pinakamalaking entablado ng palakasan sa buong mundo.
