Inaprubahan ng Kapulungan ng mga Kinatawan sa pamumuno ni Speaker Martin G. Romualdez sa ikatlo at huling pagbasa ang panukalang batas na nagbibigay ng pagkamamamayang Pilipino sa Canadian video blogger na si Kyle Douglas Jennermann.
Ipinasa ng mababang kamara ang House Bill 7185, na nagbigay kay Jennermann ng pagkamamamayang Filipino sa boto na 244-0-1.
Ang may-akda ng panukalang batas na si Rep. Marlyn Alonte ng Laguna ay nagsabi na si Jennerman, na may palayaw na Kulas, ay nabuhay na may layuning ipakilala ang Pilipinas sa ibang bahagi ng mundo sa pamamagitan ng kanyang Youtube channel na tinatawag na “Becoming Filipino.”
“Sa oras, pagsisikap, at pagmamahal niya sa bayan (Pilipinas), naging internet sensation siya na may malapit sa isang milyong subscribers. Sa pamamagitan ng kanyang mga vlog, nakagawa siya at naglathala ng libu-libong video content na nagpapakita ng kanyang totoong buhay na pakikipag-ugnayan at koneksyon sa mga Pilipino at sa kanilang kultura sa kabuuan ng kanyang walong taong nakaka-engganyong paglalakbay sa 80 sa 81 probinsya sa bansa,” ani Alonte sa kanyang paliwanag.
“Sa pagtingin sa mga kontribusyon ni Kyle Jennermann sa pagtataguyod ng kultura at pagkakakilanlan ng Filipino sa iba pang bahagi ng mundo, ang agarang pag-apruba ng panukalang batas na ito ay taimtim na hinahangad,” dagdag ni Alonte.
Ang HB 7185 ay ipapadala sa Senado, at sa kalaunan ay lalagdaan bilang batas ni Pangulong Ferdinand Marcos, Jr.
