MANILA, Pilipinas – Nagbabala si dating bise presidente Leni Robredo noong Miyerkules ng umaga, Oktubre 23, laban sa isang nagpapanggap bilang siya at nanghihingi ng donasyon para sa mga naapektuhan ng pagbaha sa Naga, ang kanyang bayang kinalakhan.
Sa isang post sa Facebook, sinabi ni Robredo na siya at ang Angat Buhay Pilipinas, ang NGO na kanyang itinatag, ay nagbigay pahintulot lamang sa Kaya Natin! Movement for Good Governance and Ethical Leadership upang tumanggap ng mga cash donation para sa kanyang grupo sa Naga “para sa transparency at accountability.”
Ang Kaya Natin! ay isang NGO na pinamumunuan ni dating senador Bam Aquino, na siya ring namahala sa kampanya ni Robredo noong 2022.
“Hindi ako ‘yan. Isa lang ang number ko at wala akong Messenger. Para sa mga cash donation, ang Kaya Natin lang ang awtorisadong tumanggap para sa amin para sa transparency at accountability. Wala ni isa sa Angat Buhay o sa aming Naga Team ang tatanggap ng cash donation, bilang patakaran namin. Kaya huwag maniwala sa mga nagpapanggap na ako o miyembro ng aming Angat Buhay team,” ayon sa dating bise presidente, na ngayon ay tumatakbo bilang alkalde ng Naga, sa halo ng wikang Bikolano at Ingles.
Muling ibinahagi ng Kaya Natin! at Angat Buhay ang babala ni Robredo.
Ang Angat Buhay ay tumatanggap din ng in-kind donations sa kanilang opisina sa Lungsod Quezon.
Hanggang 11 ng umaga noong Miyerkules, iniulat ng Kaya Natin! na nakatanggap na sila ng P705,000 na cash donations para sa kanilang “Bangon Naga” initiative.
Matindi ang pinsalang idinulot ng Bagyong Kristine (Trami) sa Naga at ilang bahagi ng Camarines Sur at Albay, kung saan mga kabahayan ay lubog sa baha. Ang rehiyon ng Bicol ang pinakamalubhang naapektuhan ng ulan at hangin, habang inaasahang tatama ang bagyo sa kalupaan ngayong Miyerkules ng gabi o Huwebes ng umaga, Oktubre 24.
Noong Martes ng gabi, Oktubre 22, nanawagan si Robredo ng tulong, partikular na mga pump boat, dahil hindi na makadaan ang mga truck sa malalim na baha.
Para sa mga organisasyong tumatanggap ng donasyon para sa mga apektadong komunidad, maaaring i-bookmark ang MovePH page na: #ReliefPH: Paano makatulong sa mga komunidad na naapektuhan ng Bagyong Kristine.
