Nabiktima ng isang malawakang investment scam ang maraming mamamayan sa Santiago City matapos silang hikayatin ng 2ORM o ORM na mamuhunan kapalit ng mataas na kita. Ang naturang investment scheme ay nangangako ng malaking tubo at buwanang sahod sa mga sumali. Sa unang bahagi ng operasyon, nakatanggap ng payout ang ilan sa mga naunang investors, dahilan upang mas maraming tao ang maengganyo na maglagak ng kanilang ipon. Gayunman, matapos makalikom ng malaking halaga, bigla na lamang tumigil ang mga bayad, na nagresulta sa matinding pagkalugi ng mga investors.
Ayon sa ilang biktima, may mga indibidwal na naglagak ng daan-daang libong piso hanggang kalahating milyong piso, habang ang iba nama’y napilitang mangutang o magbenta ng kanilang ari-arian upang makasali sa diumano’y lehitimong investment. Sa kabila ng lumalaking bilang ng mga nagrereklamo, nananatiling aktibo ang website ng 2ORM, 20rm.com, at patuloy pa ring nangangako ng malaking kita sa mga bagong investors.
Lumalabas ang isyu ng scam na ito sa gitna ng mainit na panahon ng halalan, kaya’t may pangamba na maaaring ginamit ang perang nakolekta mula sa 2ORM upang pondohan ang ilang kandidato. May mga ulat na ang ilan sa mga nagpapakilalang tagapamahala ng 2ORM ay may koneksyon sa ilang pulitikong tatakbo sa darating na eleksyon. Dahil dito, nanawagan ang mga biktima sa mga awtoridad na imbestigahan ang posibleng ugnayan ng investment scam na ito sa nalalapit na halalan.
Samantala, iniimbestigahan na ngayon ng mga awtoridad ang 2ORM investment scam, at hinihikayat nila ang mga biktima na lumantad at magsampa ng reklamo. Ayon sa Securities and Exchange Commission (SEC), posibleng lumabag ang 2ORM sa Anti-Pyramiding Law at iba pang batas na may kaugnayan sa financial fraud. Pinag-iingat ng mga eksperto sa pananalapi ang publiko laban sa mga kahina-hinalang investment schemes, lalo na sa mga nangangako ng mabilis at siguradong kita nang walang malinaw na negosyo o produkto.
